All Posts By

A4games

Гульнятэка на фестывалі «Вулiца Ежы»

By | Падзеі

У чэрвені мы наведалі фестываль «Вулiца Ежы», дзе разам з нашым партнёрам – сеткай крам «Знаем Играем» – правялі гульнятэку і прэзентавалі гульні нашага аўтарства: «На трох кітах», «Гаспадар цмокаў», “Мова». Хітом гульнятэкі стала МегаВежа. Да гульні выстройваліся чэргі, а гульцы збіралі вакол сябе вялікую колькасць гледачоў.

Нагадваем, што мы з вялікім задавальненнем наведаем і ваша мерапрыемства – фестываль, кірмаш, тэматычнае свята – і арганізуем вялікую гульнявую зону з настольнымі гульнямі. Мы гатовы прэзентаваць не толькі гульні ўласнай вытворчасці, але і самыя папулярныя гульні іншых выдавецтваў. Ваш фестываль мы таксама можам разнастаіць гіганцкімі версіямі настольных гульняў.

Ніжэй невялікая фотасправаздача з мерапрыемства.

«Нулявы кіламетр» расказаў пра карты фабрыкі Лапіных

By | Распрацоўкі

Аўтарскі праект Наталлі Шматко «Нулявы кіламетр» папоўніўся новым выпускам. У ім аўтар праграмы распавядае пра першую газету на тэрыторыі Беларусі, якая выдавалася ў Гродне, а таксама пра тое, як апісвалі госці наш горад у 1860 годзе, што ў XIX стагоддзі было на месцы сучаснай плошчы Леніна і навошта на ігральных картах малявалі жалуды.

З 4 сакавіка пазнавальныя перадачы, прысвечаныя гісторыі, знакавым месцам і музеям, можна ўбачыць не толькі на Youtube, але і на мясцовым тэлебачанні. Лепшыя выпускі праекта паказваюць у эфіры тэлеканала «Наш горад +» у 20.00 кожную суботу і нядзелю.

Вежа з вашымі віншаваннямі

By | Падзеі

Як добра, што ў нашым жыцці ёсць святы. Яны збіраюць людзей разам, дораць нам прыемныя пачуцці і ўспаміны. Здаўна віншаванні на святы прынята выказваць услых, запісваць у лістах ці на паштоўках. І як прыемна чарговы раз узгадаць цёплыя словы і сонечныя моманты добрых падзей, гартаючы лісткі яркай паперы з кветкамі і залацістымі літарамі.

Сёння мы хочам прапанаваць вам яшчэ адну ідэю, як надоўга пакінуць у нашай памяці віншаванні нашых сяброў і блізкіх людзей. Гэтую ідэю з выкарыстаннем “Вежы” мы падглядзелі на адной з мільёнаў старонак сучаснага інтэрнэту, і вось у чым яе сэнс.

Для стварэння арыгінальнага сувеніра бярэм звычайную драўляную “Вежу” і раздаем гасцям брускі, на каторых ім трэба запісаць асадкай ці маркерам віншаванні для гаспадара настольнай гульні. Цяпер гэта не проста “Вежа”, а сапраўдны “жывы” успамін пра ваша мерапрыемства, напоўнены цёплымі словамі і пажаданнямі, каторыя будуць радаваць свайго адрасата кожны раз ,калі ён будзе гуляць у яе з сябрамі ці проста перабіраць прыемныя навобмацак брусочкі.

Так проста зрабіць прыемны і арыгінальны падарунак любімым людзям. Давайце часцей радаваць тых, хто гэтага варты! А творчае згуртаванне “А-чатыры” з задавальненнем будзе гэтаму спрыяць.

Чарнавікі

By | Распрацоўкі

Перад тым, як трапіць да вас у рукі, настольная гульня праходзіць вялікую колькасць этапаў падрыхтоўкі.

Спачатку нараджаецца ідэя, потым, як правіла, прыдумваюцца гульнявыя карткі, і мы малюем іх ад рукі на паперы. Калі ідэя падабаецца, мы шукаем на прасторах інтэрнэту цікавыя малюнкі для нашых картак, друкуем – і тэстуем. Пасля гэтага мы разам з сябрамі дапрацоўваем гульню: балансуем, прыдумваем новыя карткі, а некаторыя старыя выкідваем альбо перапісваем, дадаем новыя элементы, рэдактуем механіку. І вось калі адчуваецца, што праект атрымліваецца цікавым, нарэшце прыступаем да дызайну. Тут таксама вялікая прастора для пошукаў і ідэй: які колер лепей падабраць, якія ілюстрацыі выкарыстаць і г.д. А калі нешта робім рукамі (як у нас атрымалася з гульнёй «Паўстанцы») то дома запускаецца ледзь не цэлая вытворчасць з шыццём чахлоў, трафарэтамі, шнуроўкай. І вельмі часта ўсяго гэтага ніхто не бачыць, бо пакупнік трымае ў руках ужо гатовы праект. А на самой справе ўсё гэта адбываецца вельмі маштабна (у плане пакрытай матэрыяламі тэрыторыі дома, памочнікаў і, вядома, смецця).

Аднойчы ў госці да нас завітала наша добрая знаёмая Ірына Новік і зрабіла пару фотаздымкаў пад назвай «Чарнавікі». На іх паказаны ўвесь працэс стварэння настольнай гульні “Паўстанцы” – чарнавікі, накіды, розныя версіі гульні, запэцканыя фарбамі рукі. Фотаздымкі атрымаліся вельмі вясёлымі і жыццёвымі, таму мы вырашылі падзяліцца нашымі «кулісамі» з усімі.

Сустракайце гісторыі стварэння нашых настольных гульняў у адным фота! У іх вы пазнаеце гульні «Паўстанцы», «Мова», «Гаспадар цмокаў», «Вежа», «На трох кітах», а таксама першы чарнавы прататып нашага новага праекту «Вожыкі».

Карты Лапіных – сапраўдны гарадзенскі сувенір

By | Новыя гульні

Ці гуляеце вы ў карты? Нават калі не гуляеце, вам абавязкова трэба дадаць сабе ў калекцыю кавалачак гісторыі Гародні.

«Карты Лапіных» – гэта праект, які намі доўга і старанна рыхтаваўся, а цяпер мы рады яго вам прадставіць.

Яшчэ ў 1923 годзе ў Гарадзенскай літаграфіі братоў Аляксандра і Абрама Лапіных была пачата вытворчасць ігральных карт. З гэтага часу гарадзенскія калоды атрымалі велізарную папулярнасць сярод гараджан, а таксама заезджых гульцоў і калекцыянераў, а літаграфія атрымала назву «Першай нацыянальнай фабрыкі ігральных карт». Гарадзенскія ігральныя карты былі вядомыя сваёй якасцю, прыгажосцю і арыгінальнасцю. У некаторых калодах замест масцяў красаваліся жалуды і званочкі, а замест простых малюнкаў каралёў – сапраўдныя гістарычныя асобы.

У 1944 годзе вытворчасць карт на фабрыцы была спынена, будынак доўга пуставаў, а цяпер там адбываецца рэканструкцыя. Падчас агляду гарышча былой фабрыкі было знойдзена некалькі ігральных карт, надрукаваных там больш за 70 гадоў таму.

Менавіта гэтыя карты мы ўзяліся аднавіць для таго, каб кожны мог адчуць у сваіх руках сапраўдную гісторыю.

Кожная ігральная карта калоды адмалявана мастаком з фрагментаў арыгіналаў пад кантролем гісторыкаў, а на кашулі і каробцы намаляваны сапраўдныя эмблемы і штампы сям’і Лапіных.

У каралях калоды вы зможаце пазнаць выявы Казіміра Вялікага, Стэфана Баторыя, Жыгімонта Аўгуста, Яна Сабескага.

Існуе некалькі сотняў варыянтаў гульняў з выкарыстаннем стандартнай калоды карт. А калі гэтая калода нясе ў сабе яшчэ і гістарычную значнасць, то яна дакладна стане адным з лепшых гарадзенскіх сувеніраў, бо ў новыя “Карты Лапіных” укладзены старанні і ўменні ўжо некалькіх пакаленняў.

Пра драўляныя настольныя гульні

By | Новыя гульні

Гульні і цацкі з натуральных матэрыялаў ужо даўно зарэкамендавалі сябе ва ўсім свеце і актыўна карыстаюцца папулярнасцю сярод гульцоў любых узростаў. Дрэва – гэта папулярны экалагічны матэрыял, рэчы з якога прыемныя навобмацак і бяспечныя для дзяцей.

Распрацоўка і выданне настольных гульняў з дрэва – гэта цікавы маштабны накірунак працы выдавецтва, якім мы займаемся ўжо два гады.

За гэты час мы выпусцілі аналаг сусветна вядомай «Джэнгі» – драўляную настольную гульню “Вежа”, якая вырабляецца з трох відаў дрэва – алешыны, хвоі і асіны.

“МегаВежа” – гэта гіганцкая версія «Вежы», якая карыстаецца асаблівай папулярнасцю сярод прыхільнікаў гульнятэк на адкрытым паветры і аматараў арыгінальных падарункаў. Наша «МегаВежа» у 30 разоў большая за стандартную гульню.

У лютым 2017 года ўбачыў свет новы праект выдавецтва «А-чатыры» – «На Трох Кітах» – гульня на баланс, якую вельмі любяць усе без выключэння дзеці. А дарослых яна радуе яшчэ і эстэтычным выкананнем.

У цяперашні час рыхтуецца да выпуску наш праект «Вежа. Вясёлыя фанты». Гэта звыклая настольная гульня з новым напаўненнем – цікавымі арыгінальнымі заданнямі, якія гульцам трэба будзе выконваць у залежнасці ад лічбы на выцягнутым бруску.

Сёння папулярная гульня «Вежа» можа стаць і добрым карпаратыўным падарункам, бо ў вытворчасць хутка паступяць першыя партыі гульні з выявай розных лагатыпаў на драўляных брусках. На настольнай гульні «Вежа» можа быць лагатып і вашай кампаніі.

Дойліды

Дойліды

МегаВежа

МегаВежа

Замкавая вежа

Замкавая вежа

На трох кітах

На трох кітах

Вежа

Вежа

«Ігракуб» – самая яркая падзея ў свеце настольных гульняў у Гародні

By | Падзеі

«Ігракуб» – гэта фестываль настольных гульняў, які ўжо тры гады запар радуе аматараў настолак Гародні, а таксама гасцей з усёй Беларусі. Галоўная мэта фестывалю – папулярызацыя настольных гульняў, пагружэнне ўсяго горада на адныя выходныя ў вясёлую і яркую атмасферу любімага хобі.

Падчас «Ігракуба» праходзіць знаёмства з настольнымі навінкамі, сустрэчы з распрацоўшчыкамі гульняў, прэзентацыі новых праектаў. Кожны год мы праводзім турніры па настольных гульнях сярод дарослых і дзяцей, дзе кожны можа пазмагацца за добры падарунак.

Важна адзначыць, што «Ігракуб» цікавы і для пачаткоўцаў у настольных гульнях. Мы ўжо атрымалі і да гэтага часу атрымліваем мноства падзяк ад гараджан, якія выпадкова зайшлі да нас на фэст ці якіх «выцягнулі» да нас сябры. На фестывалі працуе многа кансультантаў і валанцёраў, якія з радасцю пасадзяць любога жадаючага за гульнявы стол і раскажуць правілы гульні.

Упершыню «Ігракуб» прайшоў у 2014 годзе. Ужо падчас першага нашага фестывалю мы зразумелі, што традыцыю трэба працягваць. Цяпер мерапрыемства доўжыцца два дні, а яго гасцямі ўжо сталі распрацоўшчыкі з Масквы, Менску і іншых гарадоў Беларусі.

Гэтай восенню нас чакае «Ігракуб-2017», і мы ўжо рыхтуем для вас навінкі, сюрпрызы, цікавыя конкурсы і падарункі.

У нашага фестывалю ёсць сайт, дзе вы можаце паглядзець, як весела і ярка мы праводзім час на «Ігракубе». Падрабязнасці пра дату яго правядзення і расклад мерапрыемства вы зможаце знайсці на сайце фестывалю, а таксама ў групах у сацыяльных сетках бліжэй да восені.

Сспасылка на сайт http://igrokub.by/,

Суполка ў ВК https://vk.com/igrokub2015

Паўстанцы

By | Новыя гульні

“Паўстанцы” носяць ганаровае званне “першай беларускамоўнай настольнай гульні”. Менавіта яны запусцілі хвалю з’яўлення новых настолак у нашай краіне і занялі сваё пачэснае месца ў гісторыі гульняў Беларусі. “Паўстанцы” – гэта першыя крокі да з’яўлення творчага згуртавання “А-чатыры”, а апантанае жаданне прыдумаць нешта новае, а самае важнае – па-беларуску, стала галоўнай прычынай іх стварэння.

Здаўна ва ўсім свеце, і ў Беларусі ў тым ліку, існавала вялікая колькасць разнастайных настольных гульняў, але аднойчы, аблазіўшы ўвесь інтэрнэт, мы расчараваліся: уласнай беларускай настольнай гульні няма. Ідэя “Паўстанцаў” з’явілася як раз тады, на пачатку, як жарт ды беларускі аналаг “Мафіі”. Але, прадумаўшы новыя, больш цікавыя правілы, мы атрымалі ў выніку унікальную гульню, гульню, што дыхае беларускай гісторыяй, мае свой каларыт і трымае да апошніх хвілін партыі.

Для ўздельнікаў гульні важна тое, што яны могуць адчуць сябе сапраўднымі гістарычнымі асобамі-удзельнікамі ўсім вядомай падзеі 1863-1864гг. – царскімі службоўцамі, простымі сялянамі ці мужнымі паўстанцамі. Больш таго – кожны з удзельнікаў можа паўплываць на вынік паўстання, і да апошніх хвілін невядома, хто пераможа. У руках гульцоў – магчымасць змяніць гісторыю!

“Паўстанцы” выйшлі ў свет у 2013 годзе. На працягу некалькіх месяцаў праходзілі актыўныя іх прэзентацыі на тэрыторыі Беларусі і нават за яе межамі. А мы за гэтыя чатыры гады атрымалі вялізную колькасць прыемных водгукаў і падзяк, чым вельмі ганарымся.

Нам вельмі прыемна падзяліцца з вамі тым, што на першы юбілей гульні, у 2018 годзе (а гэта будзе як раз 155 год з пачатку паўстання!), творчае згуртаванне “А-чатыры” плануе святочнае перавыданне “Паўстанцаў”. Аматараў першай беларускай настолкі (а таксама аматараў гісторыі і настольных гульняў увогуле) чакае мноства сюрпрызаў – новыя ілюстрацыі, цікавы дадатак і афармленне.

Пасля “Паўстанцаў” мы выдалі ўжо новыя настольныя гульні, працуем таксама над іншымі цікавымі праектамі. Але да першай нашай беларускай настолкі мы заўсёды будзем адносіцца з асаблівым пачуццём, таму што яна стала пачаткам для многага ў нашым жыцці. Гэта ідэя, якая з цікавасці і жарту перарасла ў сапраўдную падзею і дала старт усім беларускім настольным гульням.